बेलायती प्रधानमन्त्री किअर स्टार्मर पदबाट राजीनामा दिने तयारीमा पुगेको खबर सार्वजनिक भएको छ। बेलायती सञ्चारमाध्यमहरूका अनुसार उनले स्थानीय समयअनुसार सोमबार आफ्नो बहिर्गमनको समयतालिका सार्वजनिक गर्न सक्नेछन्।

बेलायती अखबार अब्जर्भर ले स्टार्मरले आफ्नो नेतृत्व अब टिकाउ नरहेको निष्कर्ष निकालेको जनाएको छ। यद्यपि, डाउनिङ स्ट्रिटले भने उनी अझै प्रधानमन्त्रीको जिम्मेवारीमा रहने र पदमा कायम रहने पक्षमा रहेको दाबी गरेको छ।

रोयटर्सका अनुसार स्टार्मरले क्याबिनेट मन्त्री, राजनीतिक सल्लाहकार, दाता तथा ट्रेड युनियन नेताहरूसँगको परामर्शपछि राजीनामाबारे गम्भीर छलफल गरेका हुन्। हाल उनी सरकारी निवास चेकर्समा आफ्नी पत्नी भिक्टोरिया स्टार्मरसँग राजनीतिक भविष्यबारे परामर्शमा रहेको बताइएको छ।

लेबर पार्टीका वरिष्ठ नेताहरूले सोमबारसम्ममा प्रधानमन्त्रीको भविष्यबारे स्पष्ट धारणा सार्वजनिक हुने अपेक्षा गरेका छन्। यसबीच द सन पत्रिकाले एक वरिष्ठ सहयोगीलाई उद्धृत गर्दै स्टार्मर पदमा टिक्ने सम्भावना २५ प्रतिशत मात्र रहेको दाबी गरेको छ।

हालसम्म लेबर पार्टीका १०० भन्दा बढी सांसदले सार्वजनिक रूपमा स्टार्मरलाई राजीनामा दिन आग्रह गरिसकेका छन्। यो संख्या पार्टीका कुल सांसदको करिब एक चौथाइ बराबर रहेको जनाइएको छ।

मेकरफिल्ड उपनिर्वाचनमा एन्डी बर्नह्यामले हासिल गरेको निर्णायक जितपछि स्टार्मरमाथिको दबाब थप बढेको छ। स्काई न्युज का अनुसार बर्नह्यामले आफ्नो विजयपछि देशका लागि नयाँ राजनीतिक मार्ग आवश्यक रहेको बताएका छन् र नेतृत्व परिवर्तनको पक्षमा देखिएका छन्।

बर्नह्यामले सोमबार हाउस अफ कमन्समा शपथ ग्रहण गर्ने कार्यक्रम रहेको छ। त्यसपछि उनले स्टार्मरसँग भेट गरी आफूलाई समर्थन गर्ने सांसदहरूको सूची प्रस्तुत गर्न सक्ने बताइएको छ।

यसैबीच द टाइम्स ले बर्नह्याम प्रधानमन्त्री बनेको अवस्थामा वर्तमान चान्सलर राहेल रिभ्सलाई पदबाट हटाउने तयारी भइरहेको दाबी गरेको छ। पार्टीभित्र नयाँ दिशा आवश्यक रहेको निष्कर्षमा केही सल्लाहकार पुगेको जनाइएको छ।

सन् २०२४ को आमनिर्वाचनमा लेबर पार्टीलाई स्पष्ट बहुमत दिलाएका स्टार्मर पछिल्लो समय नीतिगत असफलता र विभिन्न विवादका कारण आलोचनामा परेका छन्। जीवनस्तर सुधार गर्ने प्रतिबद्धता पूरा गर्न नसकेको तथा अवैध आप्रवासन नियन्त्रणमा प्रभावकारी काम गर्न नसकेको आरोप उनीमाथि लाग्दै आएको छ।

यदि स्टार्मरले राजीनामा दिए वा पदबाट हटाइए भने बेलायतले एक दशकभन्दा बढी अवधिमा सातौँ प्रधानमन्त्री पाउनेछ। यसले बेलायती राजनीतिमा देखिएको निरन्तर अस्थिरतालाई थप उजागर गर्ने विश्लेषण गरिएको छ।

यद्यपि केही दिनअघि मात्रै स्टार्मरले आफूमाथि आउने कुनै पनि चुनौतीको सामना गर्ने बताएका थिए। तर पछिल्ला राजनीतिक घटनाक्रमले उनको नेतृत्वमाथि गम्भीर संकट सिर्जना भएको देखिएको छ।